في الحالة العادية مستوى الكورتيزول لازم يطيح في الليل باش يخلي الميلاتونين هرمون النوم يقوم بمهمتو. أما الـستراس يخلي الكورتيزول يقعد طالع وما يخليش مخك يدخل في النوم العميق. هذاك علاش مخك يبدا يخدم أول ما تحط راسك عالمخدة وتحس روحك ما رقدتش وتفيق من أقل حركة وإلا حس.

الميلاتونين يطلع بطريقة طبيعيّة دقات القلب تهدى وسخانة البدن تطيح، وهذي هي أهم الشروط، باش تدخل في نوم عميق ومرتاح.

والنتيجة: فيسع ما تغطس في نوم متواصل من غير ما تفيق كل شوية والصباح تقوم في فورمة

وقت اللي يطلَع الكورتيزول يحفز الغدد الدهنيّة ويخلّيها تفرز برشة زيوت تسد المَسام،  ويسرع في  تحطيم الكولاجين المسؤول على مْرونة جِلدتك. أما بالنسبة للشعر الـستريس يوقّف نموّ الشعرة من عروقها ويضعّف وصول الدم لفروة الرأس.

و تولّي تلاحظ حبوب تطلع فجأة, بشرة شايحة وتساقط الشعر مع فقدان اللّمعان الطبيعي

بدنك يبدا يوجه في المنافع والأكسجين للبلايص اللي كانت منسية كيف الجلدة وبصيلات الشعر. هذا ينقّص من الالتهابات ويخلي خلايا البشرة تتجدد وتصنع الكولاجين بطريقة طبيعية وحتى الدورة الدموية في فروة الراس ترجع باش الشعر يطوال من جديد.

تبدا تلاحظ نقص كبير في تساقط الشعر والوجه يصفى فيسع وآثار الحبوب والالتهابات تبرى أسرع ببرشة ملي كانت عليه وقت الستراس.

كيف تتوتر بدنك ينتج الكورتيزول الهرمون هذا يغيّر طريقة توزيع الشحم في بدنك. يخزن الدهون في الكرش بالذات باش يحمي الأعضاء الداخلية في حالات الطوارئ. وزيد على هذا الستراس يدفعك للاكل العاطفي تولي تاكل أكثر وفي نفس الوقت يطيّح في معدل الحرق وهكا تولي تنحية الشحم الزايد تحدي صعيب برشة.

بدنك يبدا يدخل في توازن بيولوجي ويبـدا يرجّع الميكانيزم متاعو ويحرق الماكلة بطريقة طبيعية. الهدوء الهرموني ينقّص عليك نوبات الجوع المفاجئ والشهوة متاع السكر، وهكّة بدنك يولي ينجّم يحرق الشحم المكدّس ويحوّلو لطاقة.

هرمون الكورتيزول يضعف خلايا الدم البيضاء الخط الدفاع الأول ضد الفيروسات والبكتيريا. الستراس المتواصل يخلي جهازك المناعي يدخل بعضو، إنتاج الأجسام المضادة ينقص والالتهابات في بدنك تزيد.

على هذاكا تولي تمرض فيسع، و تبرا بالسيف و تولي تحس بإلتهابات في المفاصل و العضلات من غير سبب.

جهازك المناعي يتسرح من ضغط الهرمونات ويرجع التوازن متاعو ويبدا يصنع في خلايا دفاعية قوية وفعالة. وهذا يخلي الخلايا المناعية تركز أكثر على تصليح الأنسجة ومهاجمة الميكروبات بدقة.
تبدا تلاحظ بدنك يقاوم الأمراض الموسمية وجروحك تبرى أسرع وتحس روحك ما عادش فاشل و تاعب ديما

وقت اللي يطلع الكورتيزول يؤدي لزيادة نشاط اللوزة الدماغية اللي هي مركز الخوف. وفي نفس الوقت يقلص حجم الخلايا في مركز الذاكرة والمزاج.الخلل هذا يمنع مخك من موازنة النواقل العصبية كيما السيروتونين والدوبامين وهذا اللي يخليك ديما في حالة استنزاف عصبي.

تولي تحس روحك ماكش منجم تركز حتى في أبسط القرارات اليومية. تحس بضيق في صدرك وعندك الخوف من المجهول وتتغشش من أقل حاجة ولا تجيك رغبة باش تبعد وتنعزل على الناس.

مخك يرجع توازنو الكيميائي الطبيعي ويبدا يفرز في هرمونات السعادة بانتظام. الـستراس ينقص والجهاز العصبي يركح وقتها مناطق التخمام المنطقي في مخك ترجع تخدم من جديد وفي بلاصة ما تعيش في حالة خوف تولي تفكر بوضوح.

باش تلاحظ فرق كبير: أفكارك تولي مرتبة وقدرتك على الإبداع وحل المشاكل ترجع كيف ما كانت وأقوى. الحاجات الصغيرة ما عادش تقلقك كيف قبل و الـثقل النفسي اللي كنت حاسّ بيه يتنحى